बेला होइन यो केवल यहाँ फेसबुक चलाउने ।
ना ना तर्कमा मग्न मनलाई कमेन्टमा हराउने ॥
फ्याँकी हात्को मोबाइल पर उता सजग बनाउने ।
आओ चिन्तन गरौं जनहरू सबै राष्ट्र जोगाउने ॥
***
राष्ट्र नै हो गरीमा शिर सबको माथि उठाउने ।
गयो गिर्यो धरासयी भयो भने के लाई समाउने ॥
सोचेर बहुत दिमाग लगाई निष्कर्ष निकालौं है ।
पौरख अथक लगाई श्रमको प्रेमले अङ्गालौँ है ॥
*****
आए विघ्न तमाम तिर बनेर बज्रिए वक्षस्थल ।
थाप्दै बज्र सरी चोट प्रहर प्रहरमा आफ्नै शिर उपर ॥
भूकम्प बहत्तरले अतिशय पिडा दियो जनमा ।
कोरोना भनिने डरलाग्दो रोगले त्रास छर्यो विश्वमा ॥
******
आयो विनाशकारी रोग भयङ्कर रुघा खोकीको भेषमा ।
गयो ज्यान अकाल मृत्यु मुखमा अमेरिका’दि देशमा ॥
युहान हो उद्गम स्थल चिनियाँ कोरोना जन्माउने ।
आयो टप्प टिप्यो उड्यो प्राण पखेरु संसार हल्लाउने ॥
******
हावा सरी द्रुत सूक्ष्म गतिले छिर्यो पस्यो त्यो तनमा ।
गाँज्यो भित्र भित्रै मांसपटलमा शरीरको अङ्गमा ॥
गन्दै छान्दै अनेक राष्ट्रहरूमा कोभिड फैली गयो ।
हाहाकार भयो विश्व जगतमा हुण्डरी मच्ची गयो ॥
******
लाखौको गन्ती सङ्ख्या भयो नअटिने मर्नेहरुको सूची ।
गाह्रो भो अतिशय ज्यून पनि त देखेर विश्वको मति ॥
त्राहि त्राहि अहो ! विश्व जगत ए! मुर्झायो मुर्दा सरी ।
बुझ्नै गाह्रो झन् कठिन हुँदै गयो अन्त्य हुने कसरी ?
******
*******
